Bir Vatan, bir el, bir bayroq!

Xalqimizni yagona maqsadlar va ulug‘ orzular atrofida birlashtirish, yosh avlod qalbida milliy g‘urur, vatanparvarlik va sadoqat tuyg‘ularini yanada mustahkamlashda davlat ramzlari beqiyos ahamiyat kasb etadi. Shu bois bayrog‘imiz, gerbimiz va madhiyamiz qabul qilingan sana yurtimizda umumxalq bayrami sifatida keng nishonlanib, ezgu an’anaga aylangan. Davlat ramzlari — bu milliy o‘zligimiz, mustaqilligimiz va suverenitetimizning muqaddas timsoli. Ular xalqimizning boy tarixini, betakror madaniyatini, ertangi kunga bo‘lgan ishonchini o‘zida mujassam etgan. O‘zbekiston Respublikasi Davlat bayrog‘i qabul qilinganining 34 yilligi munosabati bilan Qarshi davlat universitetida “Bir Vatan, bir el, bir bayroq!” shiori ostida tantanali bayram tadbiri bo‘lib o‘tdi. Milliy birlik va yuksak vatanparvarlik ruhida o‘tgan ushbu tadbirda Qashqadaryo viloyati prokuraturasi xodimlari, universitet professor-o‘qituvchilari hamda talaba-yoshlar ishtirok etdilar. Tadbir davomida viloyat prokurorining o‘rinbosari S.Fayziyev, universitet dotsentlari T.Qurbonov va J.Boysunov tomonidan bayrog‘imizning tarixiy mazmuni, xalqimizning orzu-intilishlari va ajdodlarimizning bebaho merosini aks ettiruvchi ma’ruzalar taqdim etildi. Shuningdek, mazkur mavzuga oid videolavha namoyish etildi. Viloyat san’atkorlari tomonidan ijro etilgan vatanparvarlik ruhidagi kuy-qo‘shiqlar yig‘ilganlarga ko‘tarinki kayfiyat, faxr va ilhom bag‘ishladi.