17-noyabr — Xalqaro talabalar kuni
Har yili 17-noyabr — Xalqaro talabalar kuni (International Students' Day) sifatida keng nishonlanadi. Mazkur sana munosabati bilan viloyat musiqali drama teatrida bayramona tadbir tashkil etildi. Unda Qarshi davlat universiteti professor-o‘qituvchilari hamda talaba-yoshlari ishtirok etdilar. Tadbir avvalida universitet rektorining bayram tabrigi Yoshlar masalalari va ma’naviy-ma’rifiy ishlar bo‘yicha birinchi prorektor O.Kuziyev tomonidan o‘qib eshittirildi. Shundan so‘ng oliygohda ta’lim, ilm-fan, ma’naviy-ma’rifiy jarayonlar va bunyodkorlik yo‘nalishlarida amalga oshirilayotgan ishlar haqida hikoya qiluvchi videolavha namoyish etildi. Bayram davomida universitetning faol va iqtidorli talabalari esdalik sovg‘alari hamda pul mukofotlari aks etgan vaucherlar bilan taqdirlandi. Viloyat musiqali drama teatri ijodkorlari tomonidan sahnalashtirilgan badiiy chiqishlar va kuy-qo‘shiqlar tadbirga yanada ko‘tarinki ruh bag‘ishladi.