Yosh olimlarning xorijiy ilmiy stajirovkalari davom etmoqda

Oliy ta’lim, fan va innovatsiyalar vazirligi huzuridagi Innovatsion rivojlanish agentligi hamda Ilm-fanni moliyalashtirish va innovatsiyalarni qo‘llab-quvvatlash jamg‘armasi yosh olimlarni yetakchi xorijiy ilmiy markazlarda qisqa muddatli stajirovkalarga yuborishni izchil davom ettirmoqda. Shu dastur doirasida Qarshi davlat universitetining Xalqaro reytinglar bo‘yicha mutaxassisi Nurbek Farmonov oktyabr–noyabr oylarida Ispaniyaning Soriya shahrida joylashgan Valladolid universitetida ilmiy stajirovka o‘tamoqda. U professor Xuan Migel Zarandona rahbarligida  XX asr Amerika adabiyotidagi naturalizm va realizm yo‘nalishlariga oid tadqiqotlar olib bormoqda. Ushbu jarayonda amerikalik naturalist yozuvchi Teodor Drayzerning “Baxtiqaro Kerri”, “Jenni Gerhardt”, “Amerika fojiasi” kabi romanlari tahlil qilinib, yozuvchining obraz yaratish mahorati o‘rganilmoqda. Stajirovka doirasida erishilgan natijalar asosida Nurbek Farmonov hamkor oliygohning O‘g‘zaki va yozma tarjimashunoslik fakulteti professor-o‘qituvchilari uchun “Drayzer asarlarining o‘zbek adabiyotiga ta’siri” mavzusida seminar o‘tkazdi. Shuningdek, Valladolid universitetining ingliz tili yo‘nalishidagi talabalari uchun O‘zbekiston ta’lim tizimi, chet tillarini o‘qitish jarayoni, Qarshi davlat universiteti hamda Xorijiy tillar fakulteti faoliyati haqida taqdimot ham tashkil etdi. Hozirda ilmiy stajirovka davom etmoqda.