“Kuch birlikda – zo‘ravonlikka o‘rin yo‘q” mavzusida ma’rifiy tadbir

Har yili dunyo bo‘ylab o‘tkaziladigan “Zo‘ravonlikka qarshi 16 kun” kampaniyasi 25-noyabr – Xalqaro xotin-qizlarga nisbatan zo‘ravonlikni bartaraf etish kuni bilan boshlanib, 10-dekabr – Xalqaro inson huquqlari kuni bilan yakunlanadi. Mazkur tashabbus ayollarga nisbatan zo‘ravonlikka jamoatchilik e’tiborini qaratish va inson huquqlarini himoya qilishga xizmat qiladi. Ana shu doirada bugun Qarshi davlat universitetida “Kuch birlikda – zo‘ravonlikka o‘rin yo‘q” mavzusida ma’rifiy tadbir o‘tkazildi. Tadbirga viloyat “Oqila ayollar” harakati a’zosi Kommuna Ismoilova, shuningdek Qarshi shahar IIO FMB xotin-qizlar masalalari bo‘yicha katta inspektor, podpolkovnik Nargiza Maqsadova taklif etildi. Tadbir davomida zo‘ravonlikning asosiy ko‘rinishlari, uning jamiyatga ta’siri hamda bunday holatlarning oldini olishda yoshlarning faolligi muhimligi haqida so‘z yuritildi. Ishtirokchilarga xotin-qizlarni himoya qilish, tazyiq va zo‘ravonlikning oldini olish bo‘yicha mamlakatimizda yo‘lga qo‘yilgan islohotlar va amaliy mexanizmlar haqida ma’lumotlar taqdim etildi. Tadbir jarayonida mavzuga oid videoroliklar namoyish etildi, talaba qizlar tomonidan sahnaviy chiqishlar ijro etildi. Mazkur uchrashuv yoshlar ongida zo‘ravonlikka qarshi ongli munosabatni shakllantirishga xizmat qiladi.