Pedagogika fakultetida “Biz OITSga qarshimiz” mavzusida tadbir o‘tkazildi

Jahon sog‘liqni saqlash tashkiloti tomonidan har yili 1-dekabr sanasi “OITSga qarshi butunjahon kurash kuni” sifatida nishonlanadi. Mazkur sana OITS bilan yashayotgan shaxslarni qo‘llab-quvvatlash, kasallik alomatlari va undan saqlanish choralari bo‘yicha aholining xabardorligini oshirishga qaratilgan. OITS ijtimoiy kasallik sifatida nafaqat iqtisodiy-ijtimoiy hayotga, balki oilaviy, ma’naviy va ruhiy muhitga ham salbiy ta’sir ko‘rsatishi bilan ahamiyatlidir. Shu bois kasallikning oldini olish, davolash va uning tarqalishini cheklash bo‘yicha tizimli, ilmiy asoslangan yondashuv muhimdir. Sana munosabati bilan Qashqadaryo viloyat OITSga qarshi kurashish markazi bilan hamkorlikda Pedagogika fakultetida “Biz OITSga qarshimiz” mavzusida uchrashuv tashkil etildi. Tadbirda fakultet professor-o‘qituvchilari va talabalari ishtirok etdi. Tadbirga Qashqadaryo viloyat OITSga qarshi kurashish markazi xodimlari D.To‘raboyeva va N.Rasulova taklif etilib, ular mavzu yuzasidan ma’lumotlar taqdim etdilar. Ma’ruzalarda slaydlar orqali tushuntirishlar berildi, tinglovchilarga tarqatma materiallar ulashildi. Tadbir yakunida ishtirokchilarga OITSdan himoyalanish, profilaktika va sog‘lom turmush tarziga oid tavsiyalar berildi.