QONUNCHILIKDAGI YANGILIKLAR
2025-yil 26-noyabr kuni O‘zbekiston Respublikasi Ta’lim, fan va innovatsiyalar vazirligi tomonidan 05/31-1/2-92-sonli xat orqali yangidan qabul qilingan 8 ta normativ-huquqiy hujjat yuborildi. Ushbu hujjatlar bilan O‘zbekiston Respublikasi Qonunchilik ma’lumotlari bazasi — www.lex.uz orqali tanishib chiqish mumkin.
Quyida mazkur normativ hujjatlarning eng muhim va dolzarblarining mazmun-mohiyati bayon etiladi.
Konstitutsiya kuniga tayyorgarlik bo‘yicha Prezident farmoyishi
O‘zbekiston Respublikasi Prezidentining 2025-yil 21-noyabrdagi 60-sonli farmoyishi bilan “O‘zbekiston Respublikasi Konstitutsiyasi kuni bayramiga tayyorgarlik ko‘rish va uni o‘tkazish to‘g‘risida”gi topshiriqlar tasdiqlangan.
Farmoyishda quyidagi vazifalar belgilangan:
Konstitutsiyaning 33 yilligini munosib va yuksak saviyada nishonlash;
fuqarolarni Bosh qomusda belgilab qo‘yilgan ezgu qadriyatlar atrofida birlashtirish;
“Konstitutsiya — inson qadri, erkinlik, tenglik va adolat garovi!” shiori asosida keng ma’naviy-ma’rifiy tadbirlar tashkil etish;
yangi tahrirdagi Konstitutsiya inson huquqlari, tadbirkorlik, xususiy mulkni himoya qilish, sog‘liqni saqlash, ilm-fan, madaniyat, san’at va sport sohalarida yaratib bergan yangi imkoniyatlarni aholiga tushuntirish.
Farmoyishning 3-bandi “j”-kichik bandiga muvofiq:
barcha umumiy o‘rta, o‘rta maxsus, professional va oliy ta’lim muassasalarida Konstitutsiya darslari o‘tkazilishi,
darslarga atoqli huquqshunoslar, olimlar, sud va adliya organlari xodimlarini jalb qilish belgilangan.
Ekologiya va iqlim o‘zgarishi bo‘yicha PQ-343-son qaror
Vazirlik tomonidan yuborilgan hujjatlar orasida yana bir muhim yangilik — Prezidentning 2025-yil 18-noyabrdagi PQ-343-son “O‘zbekiston Respublikasi Ekologiya va iqlim o‘zgarishi Milliy qo‘mitasi faoliyatini tashkil etish chora-tadbirlari to‘g‘risida”gi qarori hisoblanadi.
Qarorga muvofiq:
“Atrof-muhitni muhofaza qilish sohasida ixtisoslashtirilgan tahliliy nazorat markazi” negizida “Ekologik monitoring milliy markazi” tashkil etildi.
Ekologiya qo‘mitasi bevosita Prezidentga hisobdor bo‘lib, faoliyatini davlat organlaridan mustaqil amalga oshiradi.
Hech bir mansabdor shaxs qo‘mitaning faoliyatiga aralasha olmaydi.
Qarorning 1-bandi “v”-kichik bandiga muvofiq:
Davlat ekologik nazorat inspeksiyasi (Ekopolitsiya) to‘g‘risidagi nizom tasdiqlandi.
Nizomga ko‘ra:
Ekopolitsiya — Ekologiya qo‘mitasining tarkibiy bo‘linmasi bo‘lib, to‘g‘ridan-to‘g‘ri qo‘mita raisiga bo‘ysunadi;
uning asosiy vazifasi — ekologiya va atrof-muhitni muhofaza qilish qonunchiligiga rioya etilishi ustidan davlat ekologik nazoratini amalga oshirish;
“Yashil makon” umumxalq loyihasi doirasida bajarilgan ishlarga oid ma’lumotlarning haqqoniyligi va natijadorligini nazorat qilish;
tabiatni muhofaza qilish sohasidagi qonunbuzarlik holatlarini aniqlash va qonuniy choralar ko‘rish.
Tabarrak sana – Konstitutsiya kuni
Barcha pedagog xodimlar va talaba-yoshlarga 8 dekabr — O‘zbekiston Respublikasi Konstitutsiyasi qabul qilinganining 33 yilligi munosabati bilan samimiy tabriklarimni bildiraman. Sizlarga Konstitutsiyada mustahkamlangan iqtisodiy, ijtimoiy, siyosiy va shaxsiy huquq va erkinliklaringiz hayotda to‘liq ro‘yobga chiqishini tilayman.
Muhim eslatma
Yangi qabul qilingan qonunlar va boshqa normativ-huquqiy hujjatlar bilan Adliya vazirligining www.lex.uz Qonunchilik ma’lumotlari bazasi orqali muntazam tanishib borishingizni yana bir bor ta’kidlayman.
Zero, Bosh qomusimizning 1-moddasida:
“O‘zbekiston — boshqaruvning respublika shakliga ega bo‘lgan suveren, demokratik, huquqiy, ijtimoiy va dunyoviy davlat”
deb e’lon qilingan. Shu bois pedagoglar va talabalar huquqiy madaniyatining yuqori bo‘lishi, sud-huquq islohotlarida faol bo‘lishi davr talabi hisoblanadi.
QarDU katta yuriskonsulti
S.I.Azizov