ЁШЛАР СИЁСАТИДА ЯНГИ БОСҚИЧ: ПРЕЗИДЕНТ ВА ЁШЛАР УЧРАШУВИНИНГ МАЗМУН-МОҲИЯТИ

Ҳозирги глобал ўзгаришлар шароитида ёшлар масаласи ҳар қандай давлат тараққиётининг стратегик устувор йўналишига айланмоқда. Ўзбекистон Республикаси Президентининг ёшлар билан яқинда ўтказган учрашуви мамлакатимизда ёшлар сиёсати мутлақо янги босқичга кўтарилганини яна бир бор намоён этди. Мазкур учрашув нафақат ҳисобот ёки мулоқот шаклидаги тадбир, балки ёшлар тақдири, уларнинг ижтимоий-иқтисодий фаоллиги ва интеллектуал салоҳиятини ривожлантиришга қаратилган стратегик дастурий йўналишларни белгилаб берган муҳим сиёсий воқелик сифатида баҳоланади.

Учрашувда илгари сурилган асосий ғоялардан бири – ёшларни мамлакат тараққиётининг ҳал қилувчи кучи сифатида қараш концепциясидир. Президент томонидан таъкидланганидек, ёшларга сармоя киритиш – бу келажакка сармоя киритиш демакдир.

Мазкур ёндашув қуйидаги устувор йўналишларда намоён бўлди: 

сифатли таълимни таъминлаш;

ёшларни замонавий касб-ҳунарларга ўқитиш;

тадбиркорликни қўллаб-қувватлаш;

рақамли иқтисодиёт шароитида янги имкониятлар яратиш;

ёшларнинг ижтимоий ҳимоясини кучайтириш.

Бу ерда давлат сиёсати реактив эмас, балки проактив характер касб этаётгани кузатилади. Яъни муаммоларни бартараф этишдан кўра, уларнинг олдини олишга қаратилган тизим шакллантирилмоқда.

Учрашув мазмунида таълим масаласи марказий ўрин эгаллади. Айниқса, олий таълим қамровини ошириш, хорижий университетлар филиаллари фаолиятини кенгайтириш, илмий тадқиқотларга ёшларни жалб этиш каби масалалар алоҳида таъкидланди.

Президент таълимни фақат диплом олиш воситаси эмас, балки рақобатбардошликни таъминловчи асосий омил сифатида талқин қилди. Бу эса ёшларда билим олишга нисбатан масъулиятли ёндашувни шакллантиришга хизмат қилади.

Шу нуқтаи назардан, учрашувда илгари сурилган ташаббуслар қуйидаги вазифаларни қамраб олади:

1. Ёш олимларни грантлар билан қўллаб-қувватлаш.

2.Стартап лойиҳаларини молиялаштириш механизмларини такомиллаштириш.

3. Халқаро таълим стандартларини жорий этиш.

4. Илм-фан ва ишлаб чиқариш интеграциясини кучайтириш.

Бу йўналишлар мамлакатнинг инновацион ривожланиш моделини мустаҳкамлашга хизмат қилади.

Мулоқатда ёшлар бандлиги масаласи алоҳида долзарб йўналиш сифатида кўтарилди. Ёшлар ўртасида ишсизликни камайтириш, уларни тадбиркорликка жалб этиш ва имтиёзли кредитлар ажратиш механизмларини соддалаштириш бўйича аниқ вазифалар белгилаб берилди.

Хусусан, қуйидаги йўналишлар устувор аҳамият касб этади:

“Ёшлар дафтари” орқали манзилли ёрдам кўрсатиш;

касб-ҳунарга ўқитиш марказларини кенгайтириш;

рақамли платформалар орқали иш ўринлари яратиш;

ёшлар бизнесини институционал қўллаб-қувватлаш.

Бу чора-тадбирлар ижтимоий адолатни таъминлаш ва ёшларнинг иқтисодий мустақиллигини мустаҳкамлашга хизмат қилади.

Учрашув фақат иқтисодий ёки таълим масалалари билан чекланиб қолмади. Президент ёшлар маънавияти, миллий қадриятларга садоқат ва фуқаролик масъулияти масалаларига ҳам алоҳида тўхталди.

Замонавий ахборот маконида турли мафкуравий таҳдидлар мавжуд шароитда ёшларнинг маънавий иммунитетини кучайтириш муҳим вазифа сифатида белгилаб берилди. Бу эса қуйидаги омиллар орқали таъминланиши қайд этилди:

китобхонлик маданиятини ошириш;

спорт ва маданият соҳасини ривожлантириш;

волонтёрлик ҳаракатларини қўллаб-қувватлаш;

ҳуқуқий онг ва ҳуқуқий маданиятни юксалтириш.

Шу жиҳатдан қараганда, учрашув ёшларни ҳар томонлама баркамол шахс сифатида шакллантириш концепциясини янада мустаҳкамлади.

Президент ва ёшлар учрашуви қуйидаги стратегик аҳамиятга эга:

1.Давлат ва ёшлар ўртасидаги очиқ мулоқот механизмларини мустаҳкамлади.

2. Ёшлар сиёсатидаги институционал ислоҳотларни чуқурлаштирди.

3.Ёшларнинг давлат бошқарувидаги иштирокини кенгайтиришга замин яратди.

4. “Инсон қадри учун” тамойилининг амалдаги ифодаси бўлди.

Бугунги кунда ёшлар сиёсати давлат сиёсатининг ажралмас қисмига айланган. Президентнинг мазкур учрашуви эса ушбу йўналишни янги сифат босқичига олиб чиқди.

Ўзбекистон Республикаси Президентининг ёшлар билан учрашуви мамлакатимизда ёшларга оид давлат сиёсатининг изчил ва тизимли характер касб этаётганини кўрсатди. Унда белгиланган вазифалар нафақат жорий муаммоларни ҳал этишга, балки узоқ муддатли стратегик ривожланишни таъминлашга қаратилган.

Менинг фикримча, мазкур мулоқот миллий тараққиёт стратегиясининг ёшлар билан уйғун ривожланиш моделига асос солувчи муҳим сиёсий воқелик сифатида тарихда қолади.

Қарши давлат университети

профессори, Олий таълим аьлочиси

Абдурахмон Якубов