ҚарДУ магистрантининг мақоласи халқаро антологиядан ўрин олди

Жорий йилнинг 6-февраль куни Туркиянинг Аланя шаҳрида Baygenç нашриёти томонидан нашр этилган "Ben Özbek kızıyım: Doğudan yükselen ses (Мен ўзбек қизиман: Шарқдан юксалган овоз)" номли халқаро китоб тақдимоти бўлиб ўтди. Ушбу тадбирга юртимиздан 31 нафар ўзбек хотин-қизлари иштирок этди. Ушбу жамоавий антологияда ўзбек маданияти, адабиёти, тарихи, сиёсати ва иқтисодий тузилиши, шунингдек, тарихий шахслар ҳақида ҳам маълумотлар ўрин олган. Тадбир, шунингдек, ўзбек аёллари ва қизларининг ижодий ишларини бирлаштириб, жамиятда аёлнинг ўрни, унинг ижтимоий фаоллиги ва жамоат ҳаётидаги аҳамиятини муҳокама қилиш учун муҳим майдонга айланди. Аҳамиятлиси, ушбу нуфузли тадбирда Қарши давлат университети Филология факультети 1-босқич магистранти Ситора Қўзиева ҳам иштирок этди. Тадбирда сўз олган талабамиз миллий ўйинларимизнинг ёш авлод тарбияси ҳамда жисмоний ва руҳий саломатликдаги ўрни ҳақида гапириб, антологияга киритилган мақоласининг аҳамияти ҳақида батафсил тушунча берди. Маълумот учун, талабамизнинг ушбу мақоласи Туркиянинг Байгенç нашриёти ҳамда Ўзбекистоннинг "Shine" қизлар академияси ҳамкорлигида чоп этилган "Ben Özbek kızıyım: Doğudan yükselen ses (Мен ўзбек қизиман: Шарқдан юксалган овоз)" халқаро антологиясига "Özbekistan milli çocuk oyunları – halkın ruhu ve çocukluk sevinci (Ўзбек миллий болалар ўйинлари — халқ руҳи ва болалик қувончи)" номи билан киритилди.